కురుక్షేత్ర యుద్ధాన్ని తలపించేలా ‘సంబరాల ఏటిగట్టు’ క్లైమాక్స్
మెగా మేనల్లుడు సాయిదుర్గా తేజ్ కథానాయకుడిగా నటిస్తున్న సరికొత్త చిత్రం ‘ఎస్.వై.జి (సంబరాల ఏటిగట్టు) షూటింగ్ ప్రస్తుతం శరవేగంగా జరుగుతోంది. నూతన దర్శకుడు రోహిత్ కె.పి దర్శకత్వంలో అత్యంత భారీ బడ్జెట్తో రూపొందుతున్న ఈ చిత్రం, ప్రస్తుతం హైదరాబాద్లో తన కీలకమైన క్లైమాక్స్ షెడ్యూల్ను జరుపుకుంటోంది. దాదాపు 35 రోజుల పాటు సాగే ఈ సుదీర్ఘ షెడ్యూల్లో సినిమాలోని అత్యంత కీలకమైన పతాక సన్నివేశాలను చిత్రీకరిస్తున్నారు. ఈ ఒక్క క్లైమాక్స్ కోసమే నిర్మాతలు ఏకంగా 20 కోట్ల రూపాయలకు పైగా వెచ్చిస్తుండటం టాలీవుడ్లో హాట్ టాపిక్గా మారింది.
ఈ చిత్రంలోని యాక్షన్ సన్నివేశాలు పురాణ గాథ మహాభారతంలోని కురుక్షేత్ర యుద్ధాన్ని తలపించేలా ఉంటాయని చిత్రబృందం వెల్లడించింది. స్టంట్ మాస్టర్ కెవిన్ పీటర్ నేతృత్వంలో రూపొందుతున్న ఈ యాక్షన్ ఎపిసోడ్స్ ప్రేక్షకులకు సరికొత్త అనుభూతిని పంచనున్నాయి. సినిమాలో మొత్తం 18 అద్భుతమైన పోరాట ఘట్టాలు ఉంటాయని, వాటన్నింటినీ విజువల్ హంగులతో ఎంతో ప్రతిష్టాత్మకంగా తెరకెక్కిస్తున్నట్లు నిర్మాతలు తెలిపారు.
ఈ సినిమాలో సాయిదుర్గా తేజ్ తన కెరీర్లోనే ఎన్నడూ చూడని విధంగా ఒక పవర్ఫుల్ లుక్లో కనిపించనున్నారు. పెంచిన గడ్డంతో, రగ్గడ్ లుక్లో ఆయన చేసే క్లిష్టమైన పాత్ర అభిమానులను అలరించనుంది. ‘హను-మాన్’ వంటి భారీ విజయాన్ని అందుకున్న నిర్మాతలు కె.నిరంజన్రెడ్డి, చైతన్యరెడ్డి ఈ చిత్రాన్ని ప్రైమ్ షో ఎంటర్టైన్మెంట్ పతాకంపై సుమారు 125 నుండి 150 కోట్ల రూపాయల భారీ బడ్జెట్తో నిర్మిస్తున్నారు. ఐశ్వర్య లక్ష్మి కథానాయికగా నటిస్తున్న ఈ చిత్రంలో జగపతిబాబు, సాయికుమార్, శ్రీకాంత్, అనన్య నాగళ్ల వంటి హేమాహేమీలు కీలక పాత్రలు పోషిస్తున్నారు.
తెలుగుతో పాటు తమిళం, హిందీ, కన్నడ,మలయాళ భాషల్లో పాన్-ఇండియా స్థాయిలో విడుదల కానున్న ఈ చిత్రం 2026లో థియేటర్లలో భారీ విజయాన్ని సాధించడమే లక్ష్యంగా పెట్టుకుంది. సాంకేతికంగా ఉన్నత ప్రమాణాలతో భారీ తారాగణంతో తెరకెక్కుతున్న ‘సంబరాల ఏటిగట్టు’ బాక్సాఫీస్ వద్ద ఎలాంటి సంచలనాలు సృష్టిస్తుందో చూడాలి.